English

Merħba

Il-kap tal-iskola, l-SLT jew l-edukatur li jkun qed jmexxi l-assembly jagħti merħba lill-istudenti billi jgħidilhom “Bonġu”/”L-għodwa t-tajba”. Wieħed jista’ jibda bir-radd tas-salib jew ftit minuti ta’ silenzju. 

Introduzzjoni

Illum jibda l-istaġun tar-rebbiegħa. In-natura tagħtina ħafna sinjali li tkun ġejja r-rebbiegħa għax l-għasafar jibdew isaffru u jibnu l-bejta, il-kampanja timtela’ bil-fjuri u friefet itiru, ikollna ġranet itwal u bix-xita. Ir-rebbiegħa ġġib magħha tibdil fl-ilma. L-ilma huwa riżorsa li lkoll kemm aħna għandna bżonn nieħdu ħsieb. Ejjew naraw dan il-video flimkien:

Ara

Ħsieb Riflessiv

Kulħadd għandu bżonn l-ilma għas-saħħa. Il-pjanti u l-annimali wkoll għandhom bżonn l-ilma biex jgħixu. L-ilma huwa neċessarju f’dak kollu li għandu l-ħajja. L-ilma jagħmel il-ħajja possibli fid-dinja. Alla ħalaq l-ilma meta ħalaq l-art. Aħna rridu nieħdu ħsieb li ma naħlux ilma meta ninħaslu, insajru jew naħslu l-platti. Il-parti l-kbira ta’ ġisimna huwa ilma għalhekk importanti li nixorbu l-ilma. Ejjew nisimgħu l-ħoss tal-ilma.

Talba

Mulej Ġesù għinna biex nużaw l-ilma b’mod tajjeb u hekk inkunu ta’ għajnuna għall-oħrajn u għall-pjaneta tagħna. Ammen. Kanzunetta dwar l-ilma: 

Merħba

Il-kap tal-iskola, l-SLT jew l-edukatur li jkun qed jmexxi l-assembly jagħti merħba lill-istudenti billi jgħidilhom “Bonġu”/”L-għodwa t-tajba”.  Wieħed jista’ jibda bir-radd tas-salib jew ftit minuti ta’ silenzju. 

Introduzzjoni

L-ilma huwa riżors naturali prezzjuż immens. Kull ħaġa li għandha l-ħajja għandha bżonn l-ilma biex tgħix, kemm il-bnedmin, kemm l-annimali kif ukoll il-pjanti. L-ilma jagħmel il-ħajja possibli fuq l-art. L-ilma jintuża’ spiss fil-ħajja tagħna ta’ kuljum. Wieħed għandu jagħraf juża’ l-ilma b’mod għaqli, kemm biex jgħin lilu nnifsu u anke lill-pjaneta tagħna. Ejjew naraw dan il-filmat flimkien:

Ara

Ħsieb Riflessiv

Wieħed jista’ jgħix mingħajr ikel imma mhux mingħajr ilma. Huwa bżonn li nieħdu ħsieb li ma naħlux ilma biex insalvaw id-dinja tagħna. Huwa d-dmir tagħna lkoll li nieħdu ħsieb l-ilma filwaqt li nużawh b’mod tajjeb f’kull ċirkustanza tal-ħajja ta’ kuljum. Importanti wkoll li naħdmu biex  l-ilma tagħna ma jkunx imniġġes bil-kimiċi jew sustanzi oħra perikolużi għas-saħħa tal-bniedem. Ejjew nisimgħu l-ħsejjes ta’ oċejan filwaqt li naħsbu ftit dwar dan:

Talba

O Alla, grazzi li tajtna l-ħajja. Għinna nkunu iktar attenti u nifhmu kemm huwa prezzjuż u bżonnjuż l-ilma fil-ħajja. Għinna biex nużawh b’mod għaqli kemm għas-saħħa tagħna u biex nieħdu ħsieb id-dinja tagħna. Ammen.

Merħba

Il-kap tal-iskola, l-SLT jew l-edukatur li jkun qed jmexxi l-assembly jagħti merħba lill-istudenti billi jgħidilhom “Bonġu”/”L-għodwa t-tajba”.  Wieħed jista’ jibda bir-radd tas-salib jew ftit minuti ta’ silenzju. 

Introduzzjoni

L-ilma huwa riżors naturali prezzjuż ħafna. Fejn hemm l-ilma hemm il-ħajja. Aħna l-bnedmin, l-annimali u l-pjanti l-ħin kollu għandna bżonn l-ilma. L-ilma jagħti l-ħajja fid-dinja. Aristotle, filosofu Grieg, ikkunsidra l-ilma bħala wieħed mill-erba’ elementi fundamentali fil-ħajja ta’ kuljum. Għalhekk l-ilma huwa riżorsa essenzjali u hu neccessarju li nieħdu ħsiebu biex insalvaw il-pjaneta tagħna. Ejjew naraw dan il-filmat flimkien:

Ara

Ħsieb Riflessiv

L-ilma huwa bżonnjuż fis-servizzi fil-komunità bħall-iskejjel, stazzjonijiet tat-tifi tan-nar, ristoranti, sptarijiet u servizzi oħra. Kieku kulħadd inaqqas mill-ħela tal-ilma, ikun hemm iktar ilma milli meħtieġ għas-servizzi kollha fil-komunità. Jekk kulħadd jagħmel dan, ikun t’għajnuna kbira għall-ambjent u għall-umanità. L-ilma huwa element b’saħħtu li jfejjaq. Numru kbir ta’ reliġjonijiet u spiritwalitajiet fil-prattika tagħhom jinkludu l-użu tal-ilma. Fil-Kristjaneżmu u r-reliġjonijiet l-oħra, is-sinifikat tal-ilma huwa l-purità. Huwa neċessarju li nieħdu ħsieb l-ilma fil-ħajja tal-lum, hekk kif il-pjaneta tagħna qed tiffaċċja sfidi kbar minħabba l-bdil fil-klima u t-tkabbir fl-ekonomija.

Talba

O Alla, grazzi li tagħtina l-ħajja. Għinna biex ikunu nafu iktar kemm huwa prezzjuż u neċċessarju l-ilma fil-ħajja tagħna. Agħtina li nagħrfu nużawh b’mod tajjeb kemm għas-saħħa tagħna, kif ukoll biex nieħdu ħsieb id-dinja tagħna speċjalment fid-tibdiliet kbar li għaddejjin minnhom. Ammen.

Merħba

Il-kap tal-iskola, l-SMT jew l-edukatur li jkun qed jmexxi l-assembly jagħti merħba lill-istudenti billi jgħidilhom bonġu. Wieħed jista’ jibda bir-radd tas-salib jew ftit minuti ta’ silenzju.

Introduzzjoni:

L-Ilma huwa riżorsa prezzjuża. Fejn hemm l-ilma hemm il-ħajja. Aħna l-bnedmin, l-annimali u l-pjanti l-ħin kollu għandna bżonn l-ilma. L-ilma jagħti l-ħajja fid-dinja. Aristotle, filosofu Grieg, ikkunsidra l-ilma bħala wieħed mill-erba’ elementi fundamentali fil-ħajja ta’ kuljum. Għalhekk l-ilma huwa riżorsa essenzjali u hu neccessarju li nieħdu ħsieb ir-riżorsi tal-ilma biex insalvaw il-pjaneta tagħna. Ejjew naraw dan il-video flimkien:

Ħsieb Riflessiv

Id-dinja tagħna qiegħda tinxef. Hawn popli li m’għandhomx aċċess għall-ilma tajjeb għax-xorb filwaqt li pajjiżi oħra għandhom iż-żejjed. Huwa neċessarju li kull wieħed u waħda minna jieħu ħsieb tal-ilma għax l-ilma jagħti l-ħajja u d-dinja għandha bżonnu biex tibqa’ tagħti l-ħajja. Wieħed jista’ jikkonserva l-ilma b’diversi modi. L-ilma jagħtina s-saħħa u huwa l-preżent u l-futur. Huwa urġenti li nieħdu ħsieb l-ilma madwar id-dinja kollha. L-ilma huwa element b’saħħtu li jfejjaq. Numru kbir ta’ reliġjonijiet u spiritwalitajiet jinkludu l-ilma fil-prattika tagħhom. Fil-Kristjaneżmu u r-reliġjonijiet l-oħra, is-sinifikat tal-ilma huwa l-purità. Huwa neċessarju li nieħdu ħsieb l-ilma fil-ħajja tal-lum, hekk kif il-pjaneta tagħna qed tiffaċċja sfidi kbar minħabba l-bdil fil-klima u t-tkabbir fl-ekonomija.

Talba

Mulej Ġesù grazzi li tagħtina l-ħajja. Għinna biex ikunu nafu iktar kemm huwa prezzjuż u neċċessarju l-ilma fil-ħajja tagħna. Agħtina li nagħrfu nużawh b’mod tajjeb kemm għas-saħħa tagħna kif ukoll biex nieħdu ħsieb id-dinja tagħna speċjalment minħabba l-isfidi li qed tiffaċċja d-dinja llum. Ammen.

Ipprintja l-paġna

English