It-tim tal-Iżvilupp Spiritwali fl-Iskejjel (SDS) flimkien ma’ membri ta’ prayer spaces reġgħu kkollaboraw flimkien mal-FES u offrew l-esperjenza ta’ spazji ta’ talb lit-tfal li jattendu Skolasajf.
Din is-sena, it-tema ewlenija għal Skolasajf 2022 ġiet imnebbħa mis-slogan ‘Earth Heroes, Unite!’’ Din kienet stedina għal kulħadd biex jingħaqad u jaħdem għal ambjent u soċjetà b’saħħithom. Kienet ukoll opportunità biex tispira lit-tfal biex ikunu ċittadini li jieħdu ħsieb il-komunità tagħhom u l-ambjent li jgħixu fih.
Postijiet
L-ispazji ta’ talb ġew offruti f’żewġ postijiet differenti. Fit-2, 3, u 4 ta’ Awwissu l-ispazji ta’ talb ġew armati fil-ġmiel tal-kampanja tul il-mhedda tal-Wied tal-Lunzjata ġewwa Kerċem, Għawdex u matul il-ġimgħa ta’ wara mit-8 sat-12 ta’ Awwissu ġewwa l-Portiku tal-Kappella tal-Madonna tal-Providenza ġewwa s-Siġġiewi.
10 Spazji ta’ Talb
It-tim tal-Iżvilupp Spiritwali fl-iskejjel (SDS) ħoloq għaxar spazji ta’ talb relatati mat-tema ewlenija ta’ Skolasajf ‘Earth Heroes, Unite’.
Fl-ispazju ta’ talb Midalja ta’ Eroj, it-tfal kienu ferħana joħolqu l-midalja tagħhom. Huma kitbu isimhom fuq mudelli tondi u komplew is-sentenza ‘Jien eroj meta …’. Hekk kif ippinjawha mal-flokk tagħhom, talbu lil Alla jgħinhom jagħmlu affarijiet tajba b’imħabba kbira lejn l-oħrajn.
Fl-ispazju tat-talb Żerriegħa ta’ Ħbiberija, it-tfal żammew żerriegħa f’idejhom u raw kemm hi ċkejkna. Poġġew kompost fil-qasrija u ħawlu ż-żerriegħa. Kellhom isaqqu u jieħdu ħsiebha. Meta jagħmlu hekk qed ifakkru lilhom infushom biex jieħdu ħsieb il-ħolqien u b’hekk il-ħbiberija tagħhom ma’ Alla li hu Sid il-ħolqien kollu.
Fl-ispazju tat-talb Jigsaw ta’ Talb, it-tfal ħadu żewġ biċċiet tal-jigsaw u pinġew lilhom infushom u persuna oħra li ġġieldu magħhom. Hekk kif waħħlu ż-żewġ biċċiet flimkien, talbu lil Alla biex kulħadd jerġa’ jgħix fil-paċi.
Fuq l-ispazju tat-talb Dinja Ferħana – Dinja Mdejqa, it-tfal waħħlu stampi differenti li juru modi kif nistgħu jew nagħmlu d-dinja ferħana jew imdejqa. It-tfal kitbu wkoll ħsieb jew talba ta’ maħfra lil Alla għal meta għamlu xi ħaġa ta’ ħsara lid-dinja.
Fuq l-ispazju tat-talb Grupp ta’ Ħut, it-tfal kitbu isimhom fuq forom tal-ħut u dendluhom flimkien bħala grupp. Talbu għall-għaqda u l-paċi fil-klassi tagħhom, fl-iskola, fid-dar u kullimkien.
Fl-ispazju tat-talb ta’ Tama li Tiffjorixxi, it-tfal kitbu t-tamiet tagħhom fuq karti kwadri. Huma twew l-erba’ kantunieri tal-karta biex jiltaqgħu fiċ-ċentru u poġġewha f’kontenitur mimli bl-ilma. It-tfal tbissmu hekk kif raw it-tamiet li kitbu jinfetħu fil-wiċċ tal-ilma. It-tfal iżgħar fl-età, nefħu bżieżaq tax-xewqat hekk kif semmew ix-xewqat tagħhom.
It-tfal komplew fuq spazju ta’ talb Nitolbu għad-Dinja. Huma ħadu xemgħa tal-batterija u hekk kif xegħeluha, talbu għall-qraba tagħhom jew ħbieb li jgħixu f’pajjiżi oħra u għall-pajjiżi madwar id-dinja. Poġġew ix-xemgħa fuq il-mappa, fuq il-pajjiż li offrew it-talb għalih.
Fl-ispazju ta’ talb Insib il-Qaddis Tiegħi, it-tfal ħadu l-qaddis tagħhom billi sabu l-istampa ta’ dak il-qaddis li ismu jibda bl-istess ittra ta’ isimhom. Ħasbu kif jistgħu jgħixu bħal dak il-qaddis jew qaddisa fid-dar, l-iskola u kullimkien.
Fl-ispazju ta’ talb Napprezzaw in-Natura, it-tfal kitbu talb ta’ ringrazzjament lil Alla għal xi ħaġa li togħġobhom fin-natura. Huma waħħlu ċ-ċrieki biex jiffurmaw dudu tal-ħarir.
Fl-ispazju ta’ talb Fis-Skiet, it-tfal daħlu fil-kamp, poġġew bilqiegħda u għalqu għajnejhom għal ftit minuti. Huma apprezzaw mumenti fis-skiet f’dan l-ispazju kwiet.
Ċentri ta’ Skolasajf li pparteċipaw
F’Malta, iċ-Ċentri li pparteċipaw fl-ispazji ta’ talb kienu Qormi San Bastjan, Rabat, Siġġiewi, Luqa, Żebbuġ, Mqabba, Żurrieq, Dingli, Ħamrun SĠP (ĠP) u Mosta.
F’Għawdex, iċ-ċentri li pparteċipaw kienu Xagħra (Żebbuġ u Għarb), Qala (Nadur), Sannat, Victoria (Kerċem u San Lawrenz) u Xewkija.
Grazzi!
It-tim tal-Iżvilupp Spiritwali fl-Iskejjel huwa grat lejn is-Sinjura Therese Ellul, Manager (PDDI) u s-Sinjur Justin Balzan Programme Coordinator – Programmes (PDDI) fi ħdan il-Fondazzjoni għal Servizzi Edukattivi tal-kollaborazzjoni u l-koordinazzjoni tagħhom. Kelma ta’ ringrazzjament ukoll lill-koordinaturi taċ-Ċentri, play workers, ħaddiema pastorali u edukaturi li akkumpanjaw lill-gruppi ta’ tfal matul l-esperjenza ta’ spazji ta’ talb li flimkien magħna, ipprovdejna lit-tfal opportunità li nikbru flimkien. Jalla nkomplu ngħinu lit-tfal u Alla jiltaqgħu.
