English

Merħba

Il-kap tal-iskola, l-SLT jew l-edukatur li jkun qed jmexxi l-assembly jagħti merħba lill-istudenti billi jgħidilhom “Bonġu”/”L-għodwa t-tajba”. Wieħed jista’ jibda bir-radd tas-salib jew ftit minuti ta’ silenzju. 

Introduzzjoni

Tfal, ejjew ngħixu l-ħajja tagħna t-tfal.  Ejjew nilagħbu, nieħdu gost flimkien u nkunu dejjem ferħanin. Ħa naraw lil dawn it-tfal jieħdu gost flimkien, imbagħad nagħmlu bħalhom:

Ara

Ħsieb Riflessiv

Aħna t-tfal, għalkemm żgħar, għandna l-ħajja tagħna wkoll. Filwaqt li nieħdu gost nagħmlu dak li jferraħna, hemm bżonn nitgħallmu ngħidu grazzi lil Alla, lill-ġenituri u lil dawk li jieħdu ħsiebna. Dawn in-nies imorru għax-xogħol biex jaqilgħu l-flus ħalli aħna nkunu nistgħu mmorru l-iskola u nitgħallmu. Ejjew niftakru f’dawk it-tfal li jagħmlu affarijiet li xi drabi jkunu ftit tqal għalihom u anke jgħejjew, imma jagħmluhom biex jaqilgħu l-flus ħalli jgħinu lill-familji tagħhom.

Talba

Mulej Alla, grazzi li qed ngħixu l-ħajja tagħna ta’ tfal, nilagħbu, nifirħu u mmorru l-iskola. Ammen.

Merħba

Il-kap tal-iskola, l-SLT jew l-edukatur li jkun qed jmexxi l-assembly jagħti merħba lill-istudenti billi jgħidilhom “Bonġu”/”L-għodwa t-tajba”.  Wieħed jista’ jibda bir-radd tas-salib jew ftit minuti ta’ silenzju. 

Introduzzjoni

Għeżież tfal, ftakru li t-tfulijia tagħkom hi żmien tassew sabiħ. It-tfulija hija żmien fejn titgħallmu ħafna affarijiet, tesperimentaw, tistaqsu, tiskopru u ssibu kontinwament l-għajnuna ta’ min jieħu ħsiebkom. Ejjew naraw dan il-video flimkien:

Ara

Ħsieb Riflessiv

X’rajna f’dan il-video? (Xi tfal jistgħu jagħtu l-opinjoni tagħhom). Mhux it-tfal kollha għandhom ix-xorti li jgħixu t-tfulija tagħhom bħalkom: imorru l-iskola, jitgħallmu affarijiet ġodda, jilagħbu, jipprattikaw il-passatempi tagħhom, għandhom l-uniformi u x’jilbsu. Hawn tfal li minħabba ċ-ċirkustanzi f’pajjiżhom jew fil-familji tagħhom, iridu jmorru għax-xogħol biex jgħinu lill-familji tagħhom fl-ispejjeż. Ejjew nagħmlu mument żgħir ta’ skiet naħsbu ftit f’dawn it-tfal li qed ibatu filwaqt li nirringrazzjaw lil Alla li aħna qegħdin ngħixu t-tfulija tagħna kif għandna d-dritt li ngħixuha.

Talba

Alla ħanin, għinna nferrħu li dawk li jieħdu ħsiebna u agħti l-għajnuna lil dawk it-tfal kollha li jiġu mċaħħda li jgħixu ferħanin u li jitgħallmu. Ammen.

Merħba

Il-kap tal-iskola, l-SLT jew l-edukatur li jkun qed jmexxi l-assembly jagħti merħba lill-istudenti billi jgħidilhom “Bonġu”/”L-għodwa t-tajba”.  Wieħed jista’ jibda bir-radd tas-salib jew ftit minuti ta’ silenzju. 

Introduzzjoni

It-tfulija hi żmien sabiħ. Żmien fejn nagħmlu dak li jogħġobna u ma jkollniex it-toqol tar-responsabbiltajiet tal-adulti jew ta’ dawk li jieħdu ħsiebna. Wara l-iskola, kif tgħaddu l-ħin tagħkom? (L-istudenti jistgħu jagħtu l-opinjoni tagħhom). Mhux kulħadd jista’ jgħix ħajja komda jew sabiħa wara ġurnata skola. Ħa naraw….

Ara

Ħsieb Riflessiv

Dan il-film qasir iġegħilna naħsbu u nirrealizzaw kemm aħna xxurtjati li għandna kollox, għandna l-kumdità. Dawk li jieħdu ħsiebna jgħinuna biex aħna nirċievu l-aħjar edukazzjoni. Kif rajna hawn tfal li wara l-iskola, imorru għax-xogħol biex ikunu jistgħu jgħinu lill-ġenituri, lil dawk li jieħdu ħsbiehom u lill-familji tagħhom ikomplu jgħixu. Kulħadd għandu d-dritt li jgħix, li jiekol, li jmur l-iskola u jitgħallem. Għalina din hija ħaġa normali, imma għal tfal li jgħixu f’ċerti pajjiżi mhijiex. Dawn it-tfal ikollhom jaħdmu sigħat twal biex ikollhom x’jieklu, x’jilbsu u biex jmorru l-iskola u jistudjaw.

Talba

Alla Missier, nitolbuk tieħu ħsieb tant tfal u adoloxxenti li diġa’ daħlu fid-dinja tax-xogħol minħabba diversi ċirkustanzi. Imla’ bl-għerf lill-mexxejja ta’ dawn il-pajjiżi biex jagħtu d-drittijiet lil dawn it-tfal u adoloxxenti. Agħtihom il-grazzja li jkunu jistgħu jgħixu ħajjithom ta’ vera tfal u adoloxxenti u jkollhom id-dritt għall-edukazzjoni. Grazzi Mulej tal-grazzja li tajtna li ngħixu tfulija sabiħa, immorru l-iskola u nagħmlu tant attivitajiet li jferrħuna. Ammen.

Merħba

Il-kap tal-iskola, l-SMT jew l-edukatur li jkun qed jmexxi l-assembly jagħti merħba lill-istudenti billi jgħidilhom bonġu. Wieħed jista’ jibda bir-radd tas-salib jew ftit minuti ta’ silenzju.

Introduzzjoni

M’ilniex li konna tfal, u forsi wħud minnkom għandkom ħutkom żgħar ukoll. Ejjew naħsbu ftit kif għexna t-tfulija tagħna. Żgur li kellna xi esperjenza sabiħa…. nilagħbu, immorru l-baħar, niltaqgħu mal-kuġini u l-ħbieb, noħorġu, u mitt elf ħaġ’oħra. Imma tajjeb li niftakru wkoll li madwarna hawn tfal u adoloxxenti li għandhom tfulija diffiċli. Hawn tfal u adoloxxenti li diġa’ daħlu fid-dinja tax-xogħol minħabba l-liġijiet f’pajjiżhom u diffikultajiet fil-familji tagħhom. Ejjew nitgħallmu iżjed dwar din ir-realtà:

Ara

Ħsieb Riflessiv

Huwa sabiħ li ngħixu tajjeb kull mument fil-ħajja tagħna. Għalhekk kull wieħed u waħda minnkom bħalissa tridu tgħixu ta’ studenti tal-iskola sekondarja. Tagħmlu ħilitkom li toqogħdu attenti u tippareteċipaw waqt il-lezzjonijiet, u tagħmlu x-xogħol tal-iskola b’attitudni tajba. Fejn jeħtieġ, u fejn tistgħu, titolbu l-għajnuna u anke tagħtu l-għajnuna tagħkom ukoll kull fejn tkunu. Tagħmlu attivitajiet li jogħġbukom wara l-ħin tal-iskola, tiltaqgħu ma’ xi ħbieb u tqattgħu ħin mal-familja, u ma’ dawk li jieħdu ħsiebkom. F’dan iż-żmien sabiħ li intom tinsabu fih fil-ħajja tagħkom, tajjeb ukoll li taħtfu l-opportunitajiet li jiġukom biex tikbru u titgħallmu.

Talba

Alla ħanin, filwaqt li nirringrazzjawk tal-ħajja li qed ngħixu, għinna biex nagħrfu ngħixu ż-żmien tal-adoloxxenza b’mod sabiħ u tajjeb. Ħu ħsieb lil tant adoloxxenti li diġa’ daħlu fid-dinja tax-xogħol u qegħdin ibatu minħabba l-inġustizzji f’pajjiżhom. Ammen.

Ipprintja l-paġna

English