Eye-Catching Wallpaper

Wallpaper li Jiġbed l-Għajn

“Ma rridx nitlaq minn din id-dar jien. Għalfejn ser nerġgħu nitilqu minn din id-dar biex immorru noqogħdu f’dar oħra u f’post differenti? Hawn irrid nibqa’ ngħix jien. Nobogħdok! Itlaq ’l hemm,” beda jgħajjat Manwel waqt li beda jsabbat saqajh mal-art.

Manwel, li għandu disa’ snin, beda jgħid dan il-kliem iebes lil missieru għax kien qed iħossu rrabjat u mbeżża’ ħafna. Din hija t-tielet darba li hu u ħuh iż-żgħir ser jitilqu mid-dar tagħhom biex imorru jgħixu f’dar oħra. 

L-ewwel darba kienet meta marru jgħixu man-nanna għal żmien twil sakemm il-mamà tagħhom kienet l-isptar għall-kura minħabba marda serja.

It-tieni darba li marru jgħixu f’dar oħra kienet wara l-mewt tal-mamà tagħhom.

U issa ser jerġgħu jitilqu mid-dar biex imorru joqogħdu f’dar ġdida fil-kampanja qrib l-għelieqi u l-istalel taż-żwiemel li għandu l-papà tagħhom.

Manwel u ħuh ħassewhom imdejqin ħafna għax bdew jinkwetaw li fil-kampanja mhux ser jiltaqgħu ma’ tfal oħra tal-età tagħhom ma’ min jilagħbu, u li mhux ser ikollhom il-ħwienet favoriti tagħhom minn fejn jixtru ġelat u xi ikel li jħobbu huma. Beżgħu li fl-iskola l-ġdida li sejrin fiha ser ikun hemm min ma jifhimhomx meta xi drabi jmorru l-iskola bla ħobż, bl-uniformi xi ftit maħmuġa jew meta jkunu għajjenin ħafna.

Li jmorru joqogħdu f’dar differenti kienet tfisser li kellhom iħallu dak kollu li kienu diġà draw u jridu jerġgħu jadattaw lilhom infushom. Riedu jidraw jgħixu f’ambjent ġdid qalb l-għelieqi, jidraw is-sistema ta’ skola ġdida u riedu jagħmlu ħbieb ġodda.

Din l-esperenza kienet qed taffettwalhom l-iżvilupp u l-imġiba tagħhom kemm fid-dar kif ukoll l-iskola.

Missierhom, li kien iħobbhom ħafna, fehem il-għala kienu qed iħossuhom imdejqa u rrabjati. Beda jgħidilhom li hu wkoll kien ser iħoss in-nuqqas tal-ġirien ħbieb tiegħu. Huwa qawwielhom qalbhom u qalilhom li ser ikunu jistgħu jistiednu xi ħbieb ġodda mill-iskola l-ġdida li ser jattendu fiha u li ser ikunu jistgħu jiġu jilagħbu fl-għalqa magħhom u juruhom iż-żwiemel.

Biex aktar iferraħ lit-tfal tiegħu u għax jaf kemm huma kreattivi u mimlija enerġija, il-papà qalilhom ukoll li biex iħossuhom komdi u siguri fil-kamra tas-sodda l-ġdida tagħhom, jistgħu jiddekorawha kif jixtiequ huma.

Wiċċ it-tfal xegħel bil-ferħ kif semgħuh jgħidilhom hekk.

U staqsewh,“Pa, pa, nistgħu nwaħħlu wallpaper b’xeni ta’ annimali, tal-isports favorit tagħna, jew ta’ xi karattru tal-films li nħobbu?”

“Iva, mela, tistgħu,” weġibhom il-papà. Kif rahom daqshekk ferħana, dak il-ħin stess baqgħu sejrin għand tal-ħanut biex jixtru l-wallpaper.

Wara li xtrawhom, marru dritt id-dar il-ġdida. Kif waslu, niżlu mill-karozza, fetħu l-bieb tad-dar u daħlu sparati fil-kamra tas-sodda tagħhom. It-tfal fetħu roll wallpaper b’xeni ta’ annimali tal-ġungla u bl-għajnuna tal-papà bdew iwaħħluh ma’ parti tal-ħitan. Imbagħad fetħu roll wallpaper differenti b’xena ta’ briks u waħħluh mal-kumplament tal-ħajt.

Kif il-kamra kienet iddekorata lesta bil-wallpaper, il-papà refa’ liż-żewġ subien tiegħu, wieħed fuq kull id u bieshom waħda kbira filwaqt li qalilhom, “Araw kemm ġiet sabiħa l-kamra tagħkom! Issa nixtieqkom iġġibu marker tal-kulur favorit tagħkom u pinġu jew iktbu xi ħsieb sabiħ li tridu intom fuq il-wallpaper biss li għandu xena ta’ briks. Tajjeb?” staqsiehom il-papà hekk kif beda ħiereġ mill-kamra biex imur isajjar fil-kċina.

It-tfal għamlulu sinjal b’rashom li kollox sew u bdew ipinġu u jiktbu ħsibijiet sbieħ fuq il-wallpaper bix-xena ta’ briks.

Manwel u ħuh iż-żgħir kitbu mhux biss ħsibijiet sbieħ imma kitbu dak li bdew iħossu ġewwa fihom f’forma ta’ talba lil Alla. Pinġew ukoll emojis biex jesprimu lilhom infushom u kif bdew iħossuhom.

Meta l-papà mar lura fil-kamra tagħhom, baqa’ impressjonat b’dak li esprimew uliedu fuq il-ħajt, kemm bil-kitba kif ukoll bit-tpinġija. Huwa faħħarhom ħafna u ħaddanhom miegħu.

Manwel, ferħan se jtir, qallu, “Ismagħni, pa, xi ktibt jien… O Alla, għinni nagħmel ħbieb ġodda fl-iskola l-ġdida u li ma jkun hemm ħadd li jaqbad miegħi. O Alla, jiddispjaċini meta ngħid kliem iebes u li jweġġa’ lill-papà tiegħi. Aħfirli.”

“U dawn it-tpinġijiet xi jfissru? staqsa l-papà.

Ħu Manwel iż-żgħir pront wieġbu, “Ara, pà, jien pinġejt lill-mamà għax qed inħoss ħafna n-nuqqas tal-mamà tiegħi. Nixtieq nitlob għaliha. U dawn huma bandli. Pinġejthom biex ngħid grazzi lill-ħbieb li kelli.”

“Bravi,” qalilhom il-papà.

Imbagħad il-papà ngħaqad magħhom ukoll u kiteb din it-talba, “O Alla, għin lil Manwel, lil ħuh iż-żgħir u lil tfal oħra bħalhom li għal raġuni jew oħra jkollhom iħallu d-dar tagħhom li jkunu draw jgħixu fiha. Agħtihom il-kuraġġ biex jibdew ħajja ġdida f’ambjent ġdid u għinhom jiffaċċjaw dak kollu li għad iridu jiltaqgħu miegħu.”

Il-missier fakkarhom li meta jħossuhom imdejqin, inkwetati, ferħanin jew għajjenin, jistgħu jesprimu lilhom infushom bit-tpinġija fuq dik il-wallpaper u jitolbu lil Alla jgħinhom.