Merħba
Il-kap tal-iskola, l-SLT jew l-edukatur li jkun qed jmexxi l-assembly jagħti merħba lill-istudenti billi jgħidilhom “Bonġu”/”L-għodwa t-tajba”. Wieħed jista’ jibda bir-radd tas-salib jew ftit minuti ta’ silenzju.
Introduzzjoni
Aħna nikbru ftit kuljum. Kull ġurnata ġdida nitgħallmu affarijiet ġodda mid-dar u l-iskola u nagħmlu ħbieb ġodda. Importanti li din is-sena nużaw il-ħin tagħna tajjeb biex insiru persuni aħjar. Noqogħdu bil-għaqal, ngħinu u nferrħu lill-familja u l-ħbieb tagħna. Flimkien nistgħu ngħinu lil xulxin biex nikbru jekk nitgħallmu nużaw il-ħin tagħna tajjeb. Ejjew naraw dan il-filmat flimkien.
Ara
Ħsieb Riflessiv
Kif rajna fil-filmat, it-tfal tgħallmu kemm hu importanti li ma taħlix il-ħin. Għalhekk importanti li nitgħallmu nqassmu l-ġurnata tajjeb, nilagħbu u naħdmu ħafna wkoll. B’hekk inkunu ferħana u nirnexxu fil-ħajja.
Talba
O Alla, għinna biex nużaw il-ħin tajjeb u naqdu d-dmirijietna bil-għaqal. Ammen.
Merħba
Il-kap tal-iskola, l-SLT jew l-edukatur li jkun qed jmexxi l-assembly jagħti merħba lill-istudenti billi jgħidilhom “Bonġu”/”L-għodwa t-tajba”. Wieħed jista’ jibda bir-radd tas-salib jew ftit minuti ta’ silenzju.
Introduzzjoni
Aħna nikbru ma’ kull sena li tgħaddi. Għadna kemm spiċċajna s-sena 2021 u ċċelebrajna s-sena 2022. Huwa importanti li nippjanaw kif nistgħu intejbu din is-sena u ngħixuha aħjar mis-sena ta’ qabel. Il-ħin u l-ġranet itiru u għalhekk importanti li nagħmlu użu tajjeb miż-żmien. Ejjew naraw dan il-filmat fuq kif tagħmel użu tajjeb miż-żmien.
Ara
Ħsieb Riflessiv
Kif rajna fil-filmat, importanti ħafna li nkunu ħabrieka u li nqassmu l-ħin tagħna sewwa. Il-għażż hu l-kuntrarju tal-bżulija jew it-tħabrik għax ifisser li inti ma tixtieqx taħdem u tagħmel progress. Meta nkunu ħabrieka, ma naħlux żmien u nistinkaw biex intejbu l-ħbiberiji tagħna. Dan nagħmluh billi nkunu iktar qalbna tajba mal-oħrajn, nagħtu każ lil ħaddieħor, nirrispettaw lill-oħrajn, inkunu edukati u nġibu l-paċi fil-familja, mal-ħbieb jew mal-adulti li jieħdu ħsiebna. Nitgħallmu nsolvu l-ġlied jew l-argumenti li jkollna b’mod paċifiku u naħfru. Persuna ħabrieka taqdi dmirijietha sew u bir-responsabbilita’, tgħin u tagħti prijorita’ lil dawk l-affarijiet li huma l-iktar importanti fil-ħajja. Il-bżulija tgħinek mhux biss biex tħaddem it-talenti tiegħek, imma wkoll biex ittejjeb il-karattru, ir-relazzjonijiet u l-kapaċitajiet tiegħek.
Talba
O Alla, għinna biex inkunu persuni ħabrieka li nkunu nafu napprezzaw il-valur taż-żmien ħalli nsiru persuni aħjar. Ammen.
Merħba
Il-kap tal-iskola, l-SLT jew l-edukatur li jkun qed jmexxi l-assembly jagħti merħba lill-istudenti billi jgħidilhom “Bonġu”/”L-għodwa t-tajba”. Wieħed jista’ jibda bir-radd tas-salib jew ftit minuti ta’ silenzju.
Introduzzjoni
Fil-bidu ta’ sena ġdida ħafna minna jagħmlu wegħdiet jew reżoluzzjonijiet li kultant insibuhom diffiċli li nżommuhom. Madankollu, is-sena l-ġdida tgħinna nirrealizzaw li ż-żmien hu prezzjuż u li għandna nagħmlu użu tajjeb tiegħu. Nindunaw li għandna dmirijiet u abbiltajiet li jekk nużawhom tajjeb, jistgħu jagħmluna persuni aħjar. Ejjew naraw dan il-filmat fuq kif tista ttejjeb lilek innifsek.
Ara
Ħsieb Riflessiv
L-isfidi li jkollna kuljum jgħinuna biex intejbu lilna nfusna, il-karattru tagħna, ir-relazzjonijiet tagħna ma’ xulxin kif ukoll it-talenti u l-kwalitajiet sbieħ tagħna. Intejbu l-mod kif inġibu ruħna mal-oħrajn, insiru iktar qalbna tajba, ikollna iktar kompassjoni u rispett lejn il-familja, il-ħbieb u l-adulti f’ħajjitna. Ifisser ukoll li naħtfu l-opportunita’ biex naqdu dmirijietna sewwa, li l-ħin tagħna tajjeb, li nippruvaw niffaċċjaw il-problemi u l-isfidi tal-ħajja b’mod proattiv, ħalli nużaw il-potenzjal li għandna biex inġibu bidla għall-aħjar.
Talba
O Alla, għinna biex nagħrfu li għandna potenzjal kbir fina u li nużaw il-ħin tajjeb biex nagħmlu progress fil-ħajja. Ammen.
Merħba
Il-kap tal-iskola, l-SMT jew l-edukatur li jkun qed jmexxi l-assembly jagħti merħba lill-istudenti billi jgħidilhom bonġu. Wieħed jista’ jibda bir-radd tas-salib jew ftit minuti ta’ silenzju.
Introduzzjoni:
Fil-bidu ta’ sena ġdida, nagħmlu ħafna reżoluzzjonijiet li wara nsibuhom diffiċli li nżommuhom. Madankollu, il-fatt li bdiet sena ġdida tgħinna nirrealizzaw li ż-żmien huwa prezzjuż. Billi qed ngħixu f’dinja u soċjeta’ materjalista, importanti li nistgħu naħtfu l-opportunita’ biex nirriflettu fuq it-tifsira u l-isfidi tal-ħajja. Ejjew naraw filmat b’din it-tema:
Ħsieb Riflessiv
Kif rajna fil-filmat, jeħtieġ li nfittxu t-tifsira tal-ħajja ħalli jkollna gwida ta’ dak li hu l-iktar importanti. Is-suċċess, il-flus, il-karriera u d-divertiment mhumiex l-aqwa skop ta’ ħajjitna. Iktar importanti minn hekk, għandna niffukaw fuq l-iżvilupp tagħna personali fil-qasam tar-relazzjonijiet mal-oħrajn. Tajjeb li r-relazzjonijiet tagħna ikunu mibnijin fuq il-fiduċja, li nieħdu ħsieb u nagħtu każ tal-bżonnijiet tal-oħrajn, li nkunu altruisti, nirrispettaw u naħfru. Biex tilħaq il-potenzjal tiegħek, trid tifhem int min int biex tkun tista’ tiddedika ħajtek biex ittejjeb ir-relazzjoni miegħek innifsek, mal-oħrajn, fil-ħajja spiritwali, fix-xogħol, fl-istudji u f’rabtiet oħrajn essenzjali. It-twemmin, l-attitudnijiet u l-opinjonijiet tagħna għandhom ikunu bbażati fuq ir-rispett lejn id-dinjita’ u d-drittijiet umani. Jekk tifhem tassew li inti bniedem uniku, speċjali u mżejjen bid-doni, ħajtek ikollha skop u tifsira u tkun tista’ tħares lejn l-oħrajn u tapprezza d-dinjita’ umana tagħhom.
Talba
O Alla, għinna napprezzaw il-valur taż-żmien ħalli ngħixu ħajja bi skop u tifsira li twettaqna. Ammen.
