The story is about a boy who likes to build sandcastles by the seashore. One day, another boy kicked the other boy’s sandcastle and smashed it. The boy who joyfully built the sandcastle burst into tears. However, he showed kindness to him, forgave him, and continued to play together.
Ages
- Primary Years
- Middle Years
Topics

Kastell fir-Ramel

In-nanniet ta’ Renzo għandhom post żgħir bħala villeġġjatura ħdejn il-Bajja s-Sabiħa ta’ Birżebbuġa. Għalkemm dan il-post huwa ċkejken, matul il-vaganzi tas-sajf donnu jikber għax jimtela b’ilħna ferrieħa tal-kuġini ta’ Renzo li jmorru jqattgħu ftit jiem fih flimkien man-nanniet tagħhom. Trid tarahom jarmaw is-saqqijiet mal-art ħdejn xulxin biex ikollhom fejn jorqdu waqt li jaqbżu fuqhom b’tant ferħ.
Kull filgħodu jħobbu jmorru jsellmu lil Ġesù Sagramentat u jagħmlu ftit ħin fis-skiet fil-kappella viċin tagħhom. Imbagħad, jieħdu ġirja waħda lkoll flimkien għal fuq il-bajja u min jasal l-ewwel jibda jxarrab lill-oħrajn bl-ilma baħar. Wara jaqbżu kollha jgħumu, jitilgħu jieklu biċċa ħobż biż-żejt li tkun ħawritilhom in-nanna u joqogħdu jilagħbu fuq ir-ramel.
Renzo l-hena tiegħu jibni l-kastelli fuq ir-ramel. Jibda jħaffer b’idu jew bil-pala sakemm jagħmel kanal mad-dawra tal-kastell biex imbagħad ikun jista’ jidħol l-ilma baħar fih.
Il-paletti kkuluriti tal-ġelati jużahom biex ipoġġihom bħala bnadar fuq it-turretti.

Tifel li nzerta kien qed jiġri fuq ir-ramel waqaf mistagħġeb iħares lejn il-kobor tal-kastell. F’daqqa waħda dan fettillu jagħti daqqa ta’ sieq ġor-ramel u kisser il-kastell li bil-paċenzja kollha Renzo kien bena ħalli jkun jista’ jidħol fih hu, flimkien mal-kuġini tiegħu.
“Le, le, tkissrux! Għalfejn qed tagħmel hekk?” beda jgħajjat Renzo.
Imma dak it-tifel, donnu b’vendikazzjoni, aktar kompla jkissru.
Renzo beka fuq li beka. Kemm kien ħa gost jibnih biex issa l-kastell tar-ramel spiċċa mfarrak!
Meta rah jibki u b’qalbu maqsuma, dak it-tifel ħass għafsa ta’ qalb u beda jiddispjaċih għal dak li għamel.
Imbagħad ġietu idea. Resaq bil-mod lejn Renzo u tah tgħanniqa.
Imbagħad niżel għarkupptejh u b’subgħajh kiteb l-ittra ‘S’ tal-kelma Sorry fir-ramel u talab skuża lil Renzo għal dak li għamillu.
Renzo, li kien tifel twajjeb, għamel minn kollox biex jikkalma. Minflok kompla jirrabja, iddeċieda li jaħfirlu. Kien pront ħassar l-ittra ‘S’ mir-ramel. Ir-ramel reġa’ ġie lixx bħal qabel daqslikieku ma kien ġara xejn. Huwa qallu li kien ħafirlu talli kissirlu l-kastell u filwaqt li talbu ma jerġa’ qatt jagħmel ħaġa bħal din, stiednu biex joqgħod ħdejh u flimkien jerġgħu jibnu l-kastell.
Matul il-kumplament tal-vaganzi, dak it-tifel baqa’ jinżel huwa wkoll fil-Bajja s-Sabiħa biex jiltaqa’ ma’ Renzo u l-kuġini tiegħu, jgħumu u jibnu kastelli tar-ramel flimkien.
Huwa nduna li qatt m’għandek tgħir għal xi ħaġa sabiħa u tajba li jagħmel ħaddieħor. Fehem li meta turi li vera ddispjaċiek għal dak li tkun għamilt, il-persuna l-oħra li tkun irċeviet l-azzjoni kerha mingħandek taħfirlek u ssir ħabib tiegħek ukoll.
Resources related to this story
We want to get to know you. To be able to bookmark your favourite content, please log in or sign up below.
User Sign Up
Discover more resources